Nasa higaan ko si alagà

NASA HIGAAN KO SI ALAGÀ

kadarating ko lang galing pamamalengke

nang si alagà ay nakitang nasa katre

ayos lang, 'kako, sa akin agad tumabi

baka raw may uwing isda mulâ palengke

binidyuhan ko't siya'y aking kinausap

tilà pawis ko sa kama'y nilanghap-langhap

agad siyang pinababâ, aking pinagpag

ang higaan baka may balahibong lagas

salamat, alagà, bantay ka nitong bahay

kayâ mga daga'y di makalarong tunay

naririyan ka habang ako'y nagninilay

upang kumatha ng kwento, tula't sanaysay

ngayong Pasko, mga pusà ang kasama ko

sa Noche Buena'y sila ang aking kasalo

tig-isang pritong isdâ ang tanging regalo

habang Paskong tuyó naman ang aking Pasko

- gregoriovbituinjr.

12.24.2025

* mapapanood ang bidyo sa kawing na: https://web.facebook.com/share/r/17e1KpKw5Y/ 

Salamat sa pamasko ng karinderya

SALAMAT SA PAMASKO NG KARINDERYA

mula sa kinakainan kong karinderya

sa kanilang suki ay nagregalo sila

pamaskong handog sa mga kostumer nila

ang natanggap ko'y sando, salamat talaga

bihira rin ang mga ganitong pamasko

na mga suki nila'y bibigyang regalo

marahil ay swerte sila sa taóng ito

bilang pasasalamat, namigay ng sando

kaninang umaga'y doon ako kumain

ng sinigang na isda't kangkong ang gulayin

sa kanto ang karinderya ni Ate Arlene

doon munting regalo'y inabot sa akin

katabi kong kumain ay nagpasalamat

sapagkat pareho rin kaming nakatanggap

"Merry Christmas", si Ate Arlene ang nangusap

"Merry Christmas din po", tugon kong walang kurap

- gregoriovbituinjr.

12.23.2025

* makikita sa regalo, nakasulat ay Ate Arlene's Eatery

Bawat butil, bawat patak

BAWAT BUTIL, BAWAT PATAK

pag ikaw ay magsasaka

bawat butil mahalaga

sa paggamit man ng tubig

bawat patak mahalaga

ang isa'y pinaghirapan

nang may makain ang bayan

tinanim, inalagaan

laking galak pag anihan

kapwa galing kalikasan

ating pinagtrabahuhan

nang pamilya't kabuhayan

kaginhawaha'y makamtan 

kayâ ganyan kahalaga

bawat butil, bawat patak

tiyaking di maaksaya

ang natanggap na biyaya

- gregoriovbituinjr.

12.23.2025

* larawan mula sa google

Mga tulâ ko'y di magwawagi

MGA TULÂ KO'Y DI MAGWAWAGI

batid kong sapagkat makamasa,

makabayan, makamaralitâ,

pangkababaihan, magsasaka,

aktibista, makamanggagawà

mga tulâ ko'y di magwawagi

sa anumang mga patimpalak

pawang magaganda'y napipili

gayunpaman, ako'y nagagalak

sa mga akda nilang nanalo

ako sa kanila'y nagpupugay

salamat at buháy pa rin ako

patuloy ang katha't pagninilay

pagkat tulâ ko'y upang magsilbi

sa nakikibakang mamamayan,

sa mga maliliit, naapi,

sa nais mabago ang lipunan

kung sakaling tulâ ko'y magwagi

tiyak di galing sa akademya

kundi sa pagbabakasakali

na gantimpala'y mula sa masa

- gregoriovbituinjr.

12.22.2025

Muli, sa Fiesta Carnival

MULI, SA FIESTA CARNIVAL

sa Fiesta Carnival ay muling tumambay

upang iwing kalooban ay mapalagay

dito kami noon nagkikita ni Libay

upang kumain, upang magkwentuhang tunay

alaalang laging binabalik-balikan

lalo't magpa-Paskong punô ng kalumbayan

mabuti't may madalas pagkaabalahan

magsaliksik, kumatha't rali sa lansangan

magbenta ng mga libreto kong nagawâ

planong magsalibro ng mga bagong akdâ

subukan namang nobela yaong malikhâ

magsulat ng maikling kwento, di lang tulâ

kayraming nakathâ sa Fiesta Carnival

habang naroong sa diwa'y may nakakintal

dito'y madalas nakatambay ng matagal

kakathâ habang nagugunita ang mahal

- gregoriovbituinjr.

12.22.2025

* mapapanood ang bidyo sa kawing na: https://web.facebook.com/share/r/17bjRd841V/ 

Di ko ginagamit ang "pero" sa akdâ

DI KO GINAGAMIT ANG "PERO" SA AKDÂ

matagal ko nang di ginagamit ang "pero"

salitang Kastilà, salitang Mehikano

gayong may katumbas sa wikang Filipino

na dapat gawing palasak, gamitin ito

sa wikang Ingles, ang salitang"pero" ay "but"

sa ating wika'y ngunit, subalit, datapwat

ang mga iyan ang gamit ko sa panulat

sa tula, kwento, sa ganyan ako maingat

nais kong patampukin ang sariling wikà

bilang makatâ sa katutubong salitâ

upang mapatampok din ang ninunong diwà

habang nakikibaka kapiling ng dukhâ 

ngunit, subalit, datapwat, bagamat mithî

mga salitang ganito'y pinanatili

di wikà ng mga mananakop na imbi

kung may katumbas naman, gamiting masidhi

- gregoriovbituinjr.

12.21.2025

* kahulugan ng mga salita mula sa Diksiyonaryong Adarna

Dilis pa lang, walang pating

DILIS PA LANG, WALANG PATING

ang nakulong pa lang ay dilis

wala pang nakulong na pating

di ba iya'y nakakainis

gayong mga korap na'y buking

at ang sigaw ng taumbayan:

ikulong lahat ng kurakot!

kanilang tinig ay pakinggan

ikulong ang lahat ng sangkot

paulit-ulit yaong sigaw

inuulit-ulit ng masa

nararamdaman mo ang hiyaw

upang makamit ang hustisya

magpa-Pasko lang sa kulungan

ay yaong maliit na isdâ

wala pang pating sa piitan

walang balyenang dambuhalà

- gregoriovbituinjr.

12.21.2025

* litrato mula sa pahayagang Pilipino Star Ngayon at Pang-Masa, Disyembre 20, 2025, headline at pahina 2

Nagbabakáy si alagà

NAGBABAKÁY SI ALAGÀ

nagbabakáy si alagà sa pagbukas ng pintô

gayong pahingahan niya'y di roon, ibang dakò

baka siya'y gutóm, kung makapagsasalitâ lang

sasabihing "nais kong kumain, ako'y pagbuksan."

minsan, pag-uwi ko, sa banig na'y naroon siya

nakahigâ na sa tulugan ko't nagpapahinga

at sa bangkô ako'y tatalungkô na lang sa antok

doon panagimpan ay hahabihin sa pagtulog

at ngayon, hinihintay akong siya'y papasukin

nakapikit siya, at ayoko nang istorbohin

marahil, may hinahabi rin siyang panaginip

samantalang ako'y nagising at muling iidlip

sana'y umayos na ang paglakad niya't napilay

baka nalaglag sa bubong isang gabing kay-ingay

dapat ang pahinga't tulog namin ay walong oras

upang katawan, puso't isipan ay mapalakas

- gregoriovbituinjr.

12.21.2025

Tama ang Thailand fans!

TAMA ANG THAILAND FANS!

tamâ ang Thai fans, nandayà ang Pilipinas
sa paggamit ng mga banyagà sa Gilas
na di gumagamit ng katutubong Pinoy
na tingin sa mga katutubo'y kolokoy

ginamit ay mga naturalized citizen
na di naman kabayang tumubò sa atin
para lang makapaglarô sa bansang ito
pinasok ang pagiging naturalisado

sadyang matindi ang colonial mentality
walang tiwala sa katutubo't sarili
ang mga lider ng isports sa ating bansâ
sa mga atletang banyagà nagtiwalà

para silang mga kurakot sa flood control
kitang kita na ang kanilang pambubudol
para kamtin ng bansâ ang medalyang gintô
ay di nagsikap magsanay ng katutubò

nakakahiyâ, kaytinding katotohanan
pati pala sa isports, uso ang dayaan
kayâ Thailand, mabuti't inilantad ninyo
mabuhay kayo sa pagsabi ng totoo

- gregoriovbituinjr.
12.20.2025

* ulat mula sa SportsTalkPh sa kawing na: https://www.facebook.com/share/p/1Cf6GWfftE/ at sa JerAve 24 page sa kawing na: https://www.facebook.com/share/p/1APyDPBWBS/  

Pagsusulat

PAGSUSULAT

nagsusulat ako anumang oras

di kung kailan lang may oras ako

di kung kailan lang handâ na ako

at di kung kailan ko lamang gusto

nagsusulat sapagkat manunulat

nagsusulat upang makapagmulat

sa masa ng anumang mabibigat

na isyung sa bayan nati'y pabigat

di ako tititig sa blangkong papel

o sa screen man ng laptop computer

kung wala pang anumang sasabihin

kung wala pang isyung nakakagigil

basta pluma't kwaderno'y nakahandâ

sa bulsa't bag, nang agad makakathâ

iyan ang katangian ng makatâ

may nalilikhâ kahit namumutlâ

- gregoriovbituinjr

12.20.2025

Bawal mapagod

BAWAL MAPAGOD

bawal mapagod ang diwà, puso't katawan

magpahinga pa rin ng madalas at minsan

habang naghahanda sa matitinding laban

sa pagsulat at pagkilos para sa bayan

matulog tayo ng walong oras, ang sabi

payò ng matatanda'y sundin araw-gabi

walong basong tubig ang inuming mabuti

katawa'y ipahinga kahit super-busy

minsan, hatinggabi'y gising pa't nagsusulat

nang musa ng panitik ay naritong sukat

antok ako'y di na pinigilang magmulat

upang likhain ang tulang may tugma't sukat

O, Musa ng Panitik, diwa ko't diwatà

pagkat likhang tula'y aking tulay sa madlâ

- gregoriovbituinjr.

12.20.2025

Pagpupugay sa iyo, Alex Eala!

PAGPUPUGAY SA IYO, ALEX EALA!

tagumpay ang buong taon para sa iyo

sa simulâ pa lang, bigatin ang tinalo

huling tagumpay mo'y iyang gintong medalya

sa Southeast Asian Games ay ikaw ang nanguna

sa kabila ng isyung kurakutan ngayon

O, Alex Eala, isa kang inspirasyon

ang mga kurakot, kahihiyan ng bansâ

ngunit ikaw, Alex, karangalan ng bansâ

mahalaga sa bansa ang iyong tagumpay

dahil pinataas ang moral naming tunay

sa kabilâ ng krimen ng mga kurakot

gintong medalya mo'y pag-asa ang dinulot

ang ngalan mo'y naukit na sa kasaysayan

lalo't pinataob ang maraming kalaban

nang pinakita sa mundo ang iyong husay

mabuhay ka, taaskamaong pagpupugay!

- gregoriovbituinjr.

12.19.2025

Empatso, di empathy, sa corrupt

EMPATSO, DI EMPATHY, SA CORRUPT

empatso, di empathy

sa mga pulitikong kurakot

sa mga sangkot sa ghost flood control

sa mga lingkod bayang kawatan

sa mga dinastiya't balakyot

sa nang-api't mapagsamantala

sa mga TONGresista't senaTONG

empathy, di empatso

sa masang ninakawan ng buwis

sa nagtatrabaho ng marangal

sa mga obrero't mahihirap

sa mga bata't kababaihan

sa inapi't winalan ng tinig

sa masang ninakawan ng dangal

- gregoriovbituinjr.

12.19.2025

Naglalakad pa rin sa kawalan

NAGLALAKAD PA RIN SA KAWALAN

nakatitig lamang ako sa kalangitan

tilà tulalâ pa rin doon sa lansangan

parang si Samwel Bilibit, lakad ng lakad

sa pagkawalâ ni misis, di makausad

lalo na't magpa-Pasko't magba-Bagong Taon

wala pa ring malaking isdang nakukulong

aba'y baka walâ pang limang daang piso

ang aking Noche Buena pagkat nagsosolo

isang kilong bigas, limampung pisong tuyô

malunggay, bawang, sibuyas, kamatis, toyò

walang ham, isang Red Horse, at matutulog na

iyan ang plano ng makatang nag-iisa

lakad ng lakad, nag-eehersisyo man din

pag-uwi ng bahay, hihiga na't hihimbing

- gregoriovbituinjr.

12.18.2025

* mapapanood ang bidyo sa kawing na: https://www.facebook.com/share/r/17zo5Ba6Rw/ 

Mabuhay ka, Islay Erika Bomogao!

MABUHAY KA, ISLAY ERIKA BOMOGAO!

tinalo mo ang Thai sa isports na Muay Thai

iba ka talaga pagkat napakahusay

mabuhay ka sa iyong nakamit na gintô

na sa batà mong edad ay di ka nabigô

kababayan mo si misis na Igorota

bagamat walâ na siya'y naaalala

pag may taga-Cordillera na nagwawagi

sa anumang larangan, di basta nagapi

mula ka sa lahi ng mga mandirigmâ

di kayo nasakop ng buhong na Kastilà

mula sa lahing matatapang, magigiting

sa martial arts, ipinakita mo ang galing

isang puntos lang ang lamang mo sa kalaban

sa larang na bansâ nila ang pinagmulan

mabuhay ka, O, Islay Erika Bomogao!

talà kang sadyang sa daigdig ay lumitaw!

- gregoriovbituinjr.

12.18.2025

* mula sa pahayagang Abante Tonite, Disyembre 18, 2025, p.8

Bienvenue, Chez Nous

BIENVENUE, CHEZ NOUS

sa sahig ng nasakyang traysikel

nakasulat: Bienvenue, Chez Nous

Home Sweet Home, habang ako'y pauwi

na para bang ang sasalubong ay

magandang bahay, magandang buhay

kahulugan nito'y sinaliksik

Bienvenue ay Welcome sa Paris

habang Chez Nous naman ay Our Home

kaygandang bati nang pag-uwi'y may

magandang bahay, maalwang buhay

salamat sa sinakyang traysikel

sa nabasa kahit ako'y pagod

sa maghapong paglakò ng aklat

ay may uuwian pa rin akong

bahay na ang loob ko'y palagay

- gregoriovbituinjr.

12.17.2025

* mapapanood ang bidyo sa kawing na: https://web.facebook.com/share/r/16sRK71DTp/ 

Konsehal, kinasuhan ng kapwa konsehal

 

KONSEHAL, KINASUHAN NG KAPWA KONSEHAL

(Tulâ batay sa balità sa pahayagang Bulgar, isyu ng DIsyembre 17, 2025, tampok na balita, at ulat sa pahina 2)

kapwa ko pa taga-Sampaloc, Maynilà ang sangkot

sa headline ng pahayagang Bulgar ang ibinulgar

konsehala, kinasuhan ang konsehal na buktot

kung mag-isip at sa kabastuhan nitong inasal

ibinulgar sa privilege speech ng konsehala

pati ang 'yoni message' na kahuluga'y kaytindi

paghipo sa kanyang kamay ng tinawag na Kuya

na pawang kabastusan ang ipinamamarali

di iyon paglalambing kundi sa puri'y pagyurak

mabuti't ang konsehala'y matatag at palaban

kinasuhan na ng paglabag sa Safe Spaces Act

ang konsehal na umano'y sagad sa kabastuhan

marami nang mga kurakot, marami pang bastos

kailan lingkod bayan ay magiging makatao?

kayraming trapong sa buwis ng bayan ay nabusog

kailan pa titinó ang mga nabotong trapo?

kayâ tamà lang baligtarin natin ang tatsulok!

sa konsehala ng Distrito Kwatro, pagpupugay!

saludo sa tapang mong labanan ang mga bugok

nawa hustisya'y kamtin mo, mabuhay ka! Mabuhay!

- gregoriovbituinjr

12.17.2025

Napilayan si alagà

NAPILAYAN SI ALAGÀ 

nakita kong napilayan siya

sa kapwa pusa'y napalaban ba?

nabangga ba siya't nadisgrasya?

nabidyuhan kong pilay na siya

kauuwi ko lang ng tahanan

nang siya'y agad kong nasilayan

nakaliyad ang paa sa kanan

sa kanya'y bakit nangyari iyan?

biglang umilap, di na umuwi

sa lagay niya'y ano ang sanhi?

ang kalooban ko'y di mawarì

sa kaibigang kapuri-puri

ngayong may pilay, anong gagawin?

sa beterinaryo ba'y dadalhin?

dapat muna siyang pauwiin

upang dito sa bahay gamutin

- gregoriovbituinjr.

12.17.2025

* mapapanood ang bidyo sa kawing na: https://www.facebook.com/share/v/1HNexaiUjp/ 

Sa 3 bayaning nagdiwang ng ika-150 kaarawan ngayong 2025

SA 3 BAYANING NAGDIWANG NG IKA-150 KAARAWAN NGAYONG 2025

pagpupugay po kina Oriang, Goyò, at Pingkian

sa kanilang pangsandaan, limampung kaarawan

ngayong taon, kabayanihan nila'y kinilala

na noong panahon ng mananakop nakibaka

si Oriang na asawa ng Supremo Bonifacio

Lakambini ng Katipunan, rebolusyonaryo

si Heneral Goyò ay napatay ng mga Kanô

sa Pasong Tirad, na inalay ang sariling dugô

si Gat Emilio Jacinto, Utak ng Katipunan

kasangga't kaibigan ng Supremo sa kilusan

sa Kartilya ng Katipunan ay siyang may-akda

ang Liwanag at Dilim niya'y pamana ngang sadyâ

taaskamaong pagpupugay sa tatlong bayani

ang halimbawa nila'y inspirasyon sa marami

sa bayan sila'y nagsilbi at nakibakang tunay

nang tayo'y lumayà sa pangil ng mga halimaw

- gregoriovbituinjr.

12.17.2025

* mga litrato mula sa google

Liwanag mula sa bintanà

LIWANAG MULA SA BINTANÀ

liwanag mula sa bintanà

animo'y maskara ni Batman

matang tila ba namumutlâ

sa akin nakatingin naman

may nakakathang mga tula

mula sa di pangkaraniwan

pag may nakita ang makatâ

sa kanya ngang kapaligiran

ilang halimbawa ang bahâ

at ang isyu ng ghost flood control

may proyekto raw ngunit walâ

buwis natin saan ginugol?

itutulâ anumang paksâ

kahit silang mga kurakot

maisusulat naming sadyâ

bakit dapat silang managot

kung pipili, dapat di hungkag

Kadiliman o Kasamaan?

walâ, walâ kundi Liwanag

ang pangarap ng Sambayanan

- gregoriovbituinjr.

12.16.2025

* mapapanood ang bidyo sa kawing na: https://www.facebook.com/share/r/14SqVT9EkWp/