SA IKAANIM NA DEATH MONTHSARY NI MISIS
kalahating taong singkad na nang mawalâ
si misis ngunit puso'y tigagal pang sadyâ
ako man ay abala sa rali't pagkathâ
na mukha'y masaya subalit lumuluhà
Hunyo a-Onse nang mamatay sa ospital
naghahandâ na sanang umuwi ng Cubao
uuwi kaming Lias ang bilin ng mahal
iba sa inasahan, mundo ko'y nagunaw
akala ko'y buháy siyang kami'y uuwi
alagaan siyang tunay ang aking mithi
subalit sa pagamutan siya'y nasawi
sinta'y walâ na't siya'y aming iniuwi
tigib pa rin ng luha yaring iwing pusò
subalit sa búhay, di pa dapat sumukò
kathâ lang ng kathâ kahit nasisiphayò
sa bayan at sinta'y tutupdin ang pangakò
- gregoriovbituinjr.
12.11.2025
Walang komento:
Mag-post ng isang Komento