INUMING SABAW NG TALBOS
maganda sa katawan ang sabaw ng sili
narinig ko iyan noon, ganyan ang sabi
sa panahong sa panlalata ay sakbibi
ay tamang-tamang napabili sa palengke
kaya inilaga ko ang nasabing talbos
agad na ininom ang sabaw at inubos
kaiba mang lasa niyon ay nairaos
panlalata'y nawala't di na kinakapos
bagamat di ko man magawa araw-araw
na para bang gamot na sa sakit lulusaw
ay lingguhan namang iinom niring sabaw
ika nga, baka ma-istrok, gumalaw-galaw
payo iyong hanggang ngayon ay aking tanda
na talaga namang sinunod ko nang sadya
kayrami pang gagawin para sa adhika
upang tupdin ang misyon sa obrero't dukha
- gregoriovbituinjr.
03.02.3024
Walang komento:
Mag-post ng isang Komento