SA MINUMUTYA
paano ko ba sasabihing mahal kita
kung katapatan ko'y tila di mo makita
nagsisinungaling ba yaring mga mata
o sa sarili mismo ako'y nagdududa
sinta, ikaw ang aking pinakaiibig
ikaw lang ang diwatang nais makaniig
ako ma'y tibak na nakipagkapitbisig
sa mga api nang hibik nila'y narinig
ako ma'y makatang sa tula dinaraan
ang bawat luha't hirap na nararamdaman
ako ma'y mandirigmang handa sa labanan
at karapatang pantao'y pinaglalaban
salamat, sinta, tunay kitang minumutya
bagamat ako'y madalas na walang-wala
dumaan man ang mga ligalig at sigwa
tangi kang nag-iisa sa puso ko't diwa
- gregoriovbituinjr.
12.10.2023
Walang komento:
Mag-post ng isang Komento