TIKOM AT KUYOM
nais nilang tikom ang bibig ko
at manahimik na lamang ako
hindi maaari ang ganito
ayokong mabilog itong ulo
kaya di titikom yaring bibig
sa mga nangyayaring ligalig
marapat lang isinasatinig
ang anumang dapat inuusig
kaya di pwedeng bibig ko'y tikom
laban sa dusa, hirap at gutom
lalo't kamao ko'y nakakuyom
diyan ang buhay ko malalagom
ang kamao kong kuyom ay tanda
ng pagbaka sa tuso't kuhila
sistemang bulok nga'y sadyang banta
sa buhay ng manggagawa't dukha
- gregoriovbituinjr.
12.13.2022
Walang komento:
Mag-post ng isang Komento