O, nais kitang romansahin ng mga kataga
mula sa iwing damdamin yaring sinasalita
na pawang pagsinta ang sinasambit ko't sinumpa
sa harap ng liyag na mutya't kaygandang diwata
itutula'y pagkain para sa tiyan at bibig
itula'y sahod ng paggawang puso'y pumipintig
itutula'y mula sa pusong puno ng pag-ibig
itula'y isyu ng sambayanang laya ang tindig
at sa diwata'y patuloy ang aking panunuyo
pagkat sa kariktan talagang ako'y narahuyo
di sana maumid lalamunan sa panunuyo
sa mga nakapaligid ay huwag manibugho
romantiko man akong sa tula idinaraan
yaring pamimintuho sana'y di ito kawalan
- gregoriovbituinjr.
04.03.2022
Walang komento:
Mag-post ng isang Komento