bago lumuwas ng Maynila, nagpa-check up muna
nang malaman kung sa katawan ko'y may nasira ba
nagpa-antigen, buti't negatibo ang resulta
xray, testing ng dugo, general check up talaga
mula sa lalawigan kung saan ako na-covid
pa-Maynila na kami ni misis, walang balakid
anumang resulta ng check up ay dapat mabatid
upang kung mayroon mang sakit ay di na malingid
sa pagbalik ng Maynila'y makikipag-face-to-face
sa mga kasama sa planong aming kinikinis
sabagay, sa tungkulin ko'y ayokong nagmimintis
na ginagampanan kong tapat dugo ma'y itigis
paluwas na kami ni misis, magpapa-Maynila
siya'y may bagong trabaho, ako'y dati, siyanga
magsaliksik, magsalin, magsulat, katha ng katha
bilang secgen ng org, may trabahong dapat magawa
kaya dapat talagang magpalakas ng katawan
sakit ay labanan at ang sarili'y pag-ingatan
palusugin ang bawat kalamnan, puso't isipan
upang tungkuling atang ay talagang magampanan
- gregoriovbituinjr.
11.11.2021
Walang komento:
Mag-post ng isang Komento